Ativitèdes
La ativitèdes
L Grop de la mèscres de Dèlba e Penìa porta inant ogne an per la jent dal post e per i foresć l carnascèr ladin de Fascia te sia viesta tradizionèla. En temp de carnascèr (jené e firé) vegn metù jù n calènder che vegn anunzià ence fora per la cèses per dir canche vegn fat maschèreda. Per 4 o 5 outes alalongia vegn fat apontin chesta mascherèdes e dantfora l’é la mèscres instesses che va en defilèda fora per la strèdes. Coscita ta Penìa se veit la mèscres de la tradizion, Bufon, Laché e Marascons, che vegn inant e se fèsc lèrga con sie jech de moc, paroles, sauc e bai desche oramai da anorumes en ca.
La sajon giusta l’é se sà ben d’invern, ma ence d’istà l grop se mola fora. L fin de setemèna dant da Senta Maria Maor l grop endreza la festa ta la sia da Penìa con mùsega, bai e bona speisa da zacan. I moscia chi che l’é e che che i fèsc e i met fora dut sie regoi de faceres de legn, dutes zipièdes e depentes a man, desche da tradizion.
Istà 2008:
40 anni del Grop de la Mèscres de Dèlba e Penìa
Per i carant’egn del grop, via per l’istà del 2008 l’é stat metù fora doi mostres:
- Penìa, te cèsa Dovolavilla: “Il teatro, le maschere itineranti, le piccole commedie del Carnevale ladino di Fassa”, averta duc i dis dai 19 de messèl ai 14 de setember da les 4 a les 7 domesdì;
- Cianacei, Piaz Marconi te l’Husky Pub hotel Croce Bianca: “La spettacolarità nel Carnevale Ladino di Fassa”, averta duc i dis dai 20 de messèl ai 14 de setember da les 4 a les 7 domesdì e da mesa les nef a mesa les unesc da sera.
